Na ciarieja nueva cun sëur de mujiga
Na ciaculeda cun la usc dl duo badiot The Cherry

The Cherry ie n proiet mujighel nuef dla Val Badia. Nëus the InSide ve purton chëst’ena na ancunteda danter la dumandes per gherdëina y la respostes per badiot. La usc dl duo ie de Emily Kosnter, cun chëla che on rujenà per chësta ntervista.

Pudëis’a ve prejenté n curt, prëibel?
Nos sun le duo The Cherry (ex. Emily & Mattia), metü adöm da Emily Kostner che cianta y Mattia Lezuo che sona le clavier. Te chisc agn unse soné cover di agn sessanta cina i nonanta. Cun le tëmp unse orü mëter man val’ de nü y insciö unse metü man da scrì nostes cianties. La pröma, “Still Gambling“ é gnüda fora ai 31 de messé y é da abiné sön dötes les plates de streaming, de setëmber gnaral fora nosta secunda ciantia.

De cie rejona pa “Still gambling”?
Al é na ciantia che Mattia á metü man da scrí ala fin dl 2025. Te chësta ciantia cuntel che sciöch tl jüch de fortüna, él inc tla vita da to risć datrai, ince sce les probabilitês ne é nia tres sön süa pert. La ciantia dess motivé da jí sura la tëma de se falé y purvé fora patüc nü.

Can y co v’ëis’a cunesciù?
Se un conesciü danda ot agn a en proiet organisé dal Sorvisc ai Jogn Val Badia che ê n musical da mituns, olache un trami fat para. Pur en per de agn ne unse nia plö albü contat. Tl isté dl 2022 unse partezipé al musical de Ujöp y ti maisc dedô unse metü man da sunè deboriada tla band Rise o’Clock. Tl mëter man sonânse ince cianties de dui amesa ite y un odü che al se ess salpü bel da suné ince te atres ocajiuns, porchël unse formé le duo Emily & Mattia, che é spo deventé danda en per de maisc le duo The Cherry. Dal isté dl 2023 inant sonunse te deplö hoti, bars, nozes, a evënc y tröp d’ater.

Da ulà vën pa l’idea dl inuem The Cherry?
Dô avëi suné pur deplü agn sot al inom “Emily & Mattia”, unse tut la decijiun da cambié nosc inom sön val de plü original. Ân bel adora albü l idea da avëi n früt sciöch inom dl duo. L’idea che sce an pënsa a na chërscia pënsun atira a döes, se savô darí y insciö un tut la decijiun da se dé inom “The Cherry”.

Per zachei che ne n’à mo nia audì vosta mujiga: de ce stil iela pa?
Sonun suradüt pop melodich, jazz y müjiga che passenëia tratan n aperitif o dô na cëna cun gheneda. Da en püch de tëmp sunse ince drio a scrí nostes cianties, che é de deplü stils, sciöche rock/blues, R&B y soft pop.

Cie ie pa “The Cherry Live Music Concert”?
Al é n proiet che é gnü sostegní dal IDM, olache un suné cater conzerc: al Garda tla Piazza Carlotti, a San Martin de Tor tl Istitut Ladin, a Bornech tl Ragenhaus y a Balsan tl Ciastel Marec. Da chisc conzerc ne ênse nia ma en dui, mo en sis: Emily Kostner á cianté y suné le saxophon, Mattia Lezuo á cianté y suné le clavier (Duo The Cherry) cun Emil Valentin ala bateria, Miriam Campei al saxophon y usc, Vincenzo Rinaldi ala chitara y usc y Chiara Kirchler al bas. Un soné cater cianties che nos dl duo un scrit y cover de gragn artisć dla müjiga sciöche Queen, Michael Jackson y Amy Winehouse che passenâ pro nostes cianties. Al é na gran sodisfaziun pudëi purté dant nostes cianties a tröpes porsones y odëi sciöche les porsones les sintî.

Proiec per l daunì?
Sonarun ennant te hoti, te bars, a nozes y d’atri evënc, mo al se savess dër bel proscimo ann da fa endô en proiet sciöche The Cherry Live Music Concert, che un
fat chësc isté. Sun tl laur da scrí cianties nöies y les portarun fora ti proscimi maisc sön les plataformes musicales. De dezëmber gnaral fora nosta pröma EP. Da püch unse ince nostes maglietes che á dant nosc logo cun les cherscies y iadô sön le spiné le logo dessegné do da Ursula Tavella te so stil.

Nsciuma, n inuem nuef per n duo che se cunesciova bele, y che porta mujiga, coche tl cajo de “Still gambling” propi da pudëi se goder pra n aperitif; ma nia mé. Emily Kostner y Mattia Lezuo porta l tlassich tl modern, o l modern tl tlassich, aldò de coche n uel ti cialé. A uni moda iel na ciarieja che pudessais ulëi ciarcë, povester iela pu propi de vosc gusto.

[Bruno Maruca]