Ert per la familia reéla de Abu Dhabi
Da Gherdëina ai Emirac tres si chedri: na ciaculeda cun Veronica Caterisano

Dantaldut, posses’a te prejenté n curt?
É inuem Veronica Caterisano, é 33 ani y son chersciuda su te Ghërdeina. Son n’artista prufesciunista, cumëmbra dla grupa dl’UNIKA dal 2022 incà.

Contenes ma mpue de ti furmazion artistica.
É fat la Scola d’Ert a Urtijëi, tla sezion de grafica, n stage curt al’”Accademia delle Belle Arti” a Unieja y é stlut lu l ann passà la scola prufesciunela de pitura “Milan Art Institut” cun sënta ti Stac Unic.

Ciuni ie pa ti referimënc artistics?
L’artista de referimënt plu mpurtanta ie dessegur Dimitra Milan, na pitëura jëuna che me à giaurì l mond dla pitura: ntlëuta ovela mé chindesc ani, n si depënt abinà per cajo sun internet me à tucà dassënn y da iló inant ei ulù scumencé a depënjer. D’autri artisc’ de referimënt ie Elly Milan – nsenianta y fundadëura dla Milan Art Institute –, Eric Robitaill y Alpay Efe.

Y śën stes a Abu Dhabi; can y co ie pa chësta unida a s’l dé?ù
Mi uem laurova da maitre sa mont te n hotel a cin’ stëiles y à abù la puscibltà de cunëscer truepa persones de gran mpurtanza. Danter chëstes nce n cumembër dla familia reéla di Emirac Arabs Unic. A na pitla grupa di miëur ciulieres y a mi uem ti iel unì fat la pruposta de pudëi jì a lauré per chësta persona te si cësa privata. Tl tëmp te chël mi uem y si team se à cunesciù mpue miec ntan si feries te hotel, iel unit a s’l dé che mi uem ti à cuntà de mé y ti à fat udëi mi leurës, che ti à plajù. Nscila sons unida damandeda nce ie de lauré, coche si artista privata.
L à durà n valgun ani nchin che l ie unit a s’l dé dut cant. La dumanda ufiziela de unì a lauré a Abu Dhabi ie ruveda per cajo ntan l di de mi prima giaurida pra la mostra dl’UNIKA te Gherdëina, de setëmber dl 2022. De nuvëmber nes ài scincà n’ena de vacanza a Abu Dhabi, per udëi sce l nes savëssa bel a sté iló, y per i ciulieres per fé na pitla proa. Canche son ruvei de reviers a cësa, ne ons plu audì nia y se àn mpensà che l ne fossa nia plu unit a s’l dé.
D’auril dl ann do ons giapà la resposta che son unii azetei y che assan dassù pië via mo n chël di. Per fertuna ti ons dat da ntënder che mi uem ulova mo finé la sajon. Tl tëmp de n mëns ons messù mudé nosta vita, lascé nosc lëures, saludé nosta families, lascé l cuatier che an permò finà de frabiché y scumencià a paië ju, y mëter duta nosta vita te n cufer da vint chilo per pië tl uet, zënza ne savëi ulà che saron jic a sté, cie che assan messù fé avisa y tan giut che l ëssa durà.

Cie te sà pa l plu bel ulache te stes śën?
Ie son chersciuda su te Gherdëina, é fat la scola te Gherdëina, y ne son mei stata una de chëla persones “in” che ama viagë y viver de aventura. A mi me savovel bel a sté te mi routine, te mi natura. Fove teroriseda al pensier de tan stleta che l’ësse abuda a me n jì... y scentant me falovi! Dal prim di che son ruveda a Abu Dhabi me àl sapù bel y l me sà bel dut! Me é usà ite dal prim di, o miec, mi cuer à scumencià a udëi chësc luech coche mi segonda cësa; ma sce muesse te dì l plu bel, pona te diji:
- sentì l’aria positiva dla jënt, la sensazion che dut ie puscibl sce te l ues cun dut l cuer y te des l mascimo,
- avei bel tëmp cun na mesaria de 310 dis al ann da surëdl,
- la zità ie nëta y à n sistem rigurëus y che duc respetea,
- la segurëza: posse lascé mi fonin, mi tablet, monce i scioldi sun mëisa te na ustaria o nce dedora y jì sun chegadoi. Coche ëila pudëssi jì a spaz nce dala doi daduman da sëula, che deguni ne me cialëssa cun n uedl melntenziunà; y cie che ne me ësse me aspità te n tel paesc, per l prim iede ne me sënti nia i uedli di ëi ados, che me scibla do o che me fej comentares superfiziei.

Y cie te sà pa l manco bel?
Chësta ie una dla dumandes plu ries. Povester me mancia la natura, ma vester dalonc da cësa fej a na maniera che m’la stimi mo plu che dant. Y povester ne n’ie nia ideél l ciaut d’instà: l ie stat dis che on abù na temperatura nchin a 52 gradi.

Rates’a che ti ert se ebe mudà te chësc tëmp permez a canche te stajoves te Gherdëina?
Mi ert ne se muda nia per chël che suzed ntëur mé, ma te mé. Te chisc ani che son stata tlo a Abu Dhabi, sons chesciuda dedite, é capì truep de mi vita y ulache muesse miuré. Son unida plu sterscia, plu determineda y vëije l mond cun n auter uedl, perchël se muda nce mi ert.. ma camiei ne n’ei mo mei depënt, coche duc se aspitova (rij, ndr.).
Povester me nfidi deplù a tò ca culëures vives, stersces, ajache son dalonc dal giudize de mi pensieres che ove te Gherdëina. N se stluj tan ite tla tëmes canche n ie te n pitl luech y n tënd a ti dé la gauja ai autri. La urità, che n capësc permò canche n muessa lascé dut, ie che on tan na gran fertuna a avëi tan na bela cumenanza, a pudëi jì ju per l luech y s’la ciaculé cun uniun. L ie zeche che é udu ite da dalonc. É sentì che duc da cësa y da Gherdëina fej l tifo per nëus.

Ciuni autri hobbies es’a?
L me sà bel a liejer y a scrì. Scrì ie per mé for stata na forma de esprescion al medemo livel de mi pitura, nia publica ma persunela.
L me sà nce bel a jì a spaz cun mi uem y s’la cunté, chël me basta per vester cuntënta. Unitant jons a ti cialé a una dla gran marueies che l ite te na tel gran zità, ma sce muesse te dì la urità, me cuntënti cun tan puech: udëi n pitl ciof da culëures che flurësc sun ëur de streda, n bon matcha te ustaria, m’la rì y fé da totl cun mi uem. Che son ruveda a viver tl fauz luech, chël possa bën vester, ma chi che ne vëija nia ora la legrezes tla pitla cosses, ne possa nianca les udëi tla grandes.

Per finé via: ce proiec vëijes’a te ti daunì?
É mparà che n possa avëi duc i proiec dl mond, y se njenië ca tant che n uel, ma la vita te porta for mpo inò ulache te ies destineda a vester. Ie son na persona scialdi ambiziëusa y ne é nia tëma a pensé a de gran resultac... Ma cialé de viver miuran uni di ie ntant mi majer proiet, cialé de purté dl bon sun chësc mond y udëi ite che sce l ne va nia for dut coche n uel, val ënghe bën. Sce nia miec.
Ie me mbince for tan che duc fossa boni de udëi ite che uniun de nëus à n destinn y ie de grandiscima mpurtanza sun chësc mond. Spere de pudëi vester n pitl ejëmpl per i jëuni che se fej tan ert y che nce ëi ebe l snait de ti jì do a si cuer.

[Bruno Maruca]